Senatusconsultum de nundinis saltus Beguensis in territorio Casensi, descriptum et recognitum ex libro sententiarum in senatu dictarum kani iuni nigri, C. Pomponi Camerini consulum, in quo scripta erant Africani iura et id quod infra scriptum est. Idibus octobribus in comitio in curia Iulia. Scribundo adfuerunt Q. Gargilius Q. f. Quir. Antiquus, Ti. Claudius Ti. f. Pal. Quartinus, C. Oppius C. f. Vel. Severus, C. Herennius C. f. Pal. Caecilianus, M. Iulius M. f. Quir. Clarus, P. Cassius P. f. Clarus Dexter quaestor, P. Nonius M. f. Ouf. Macrinus quaestor. In senatu fuerunt ccl.... senatusconsultum per discessionem factum. Quod P. Cassius Secundus, P. Delphius peregrinus Alfius Alennius Maximus Curtius Valerianus Proculus M. Nonius Mucianus coss. verba fecerunt de desiderio amicorum Lucili Africani clarissimi viri, qui petunt: ut ei permittatur in provincia Africa, regione Beguensi, territorio Musulamiorum, ad casas, nundinas IIII nonas novembres et XII k. decembres, ex eo omnibus mensibus IIII nonas et XII k. sui cuiusque mensis instituere habere, quid fieri placeret, de ea re ita censuerunt: permittendum Lucilio Africano, clarissimo viro, in provincia Africa, regione Beguensi, territorio Musulamiorum, ad casas, nundinas IIII nonas novembres et XII k. decembres et ex eo omnibus mensibus IIII nonas et XII k. sui cuiusque mensis instituere et habere, eoque vicinis advenisque nundinandi dumtaxat causa coire convenire sine iniuria et in commodo cuiusquam liceat. Actum idibus octobribus P. Cassio Secundo, M. Nonio Muciano. Eodem exemplo de eadem re duae tabellae signatae sunt. Signatores: T. Flavi Comini scribae, C. Iuli Fortunati scribae, M. Caesi Helui Euhelpisti, Q. Metili Onesimi, C. Iuli Periblepti, L. Verati Philerotis, T. Flavi crescentis.