L. Cornelius Cn. f. praetor senatum consuluit a. d. III nonas maias sub aede Kastorus. Scr. adf. A. Manlius A. f., Sex Iulius...., L. Postumius Sp. f. quod Tiburtes* verba fecistis quibusque de rebus vos purgavistis, ea senatus animum advortit ita uti* aequom fuit: nosque ea ita audiveramus, ut vos dixsistis* vobis* nuntiata* esse. Ea nos animum nostrum non inducebamus* ita facta esse propter ea quod scibamus ea vos merito nostro facere non potuisse, neque vos dignos esse, qui* ea faceretis, neque id vobis* neque rei publicae* vostrae oitile esse facere. Et postquam vostra verba senatus audivit, tanto magis animum nostrum inducimus*, ita uti* ante arbitrabamur, de eis* rebus af vobis* peccatum non esse. Quonque de eis* rebus senatui* purgati estis, credimus, vosque animum vostrum inducere* oportet, item vos populo Romano purgatos fore.